இளம் வீரர்களுடன் இலங்கையை எதிர்கொள்ளும் நியூசிலாந்து

 

இலங்கைக்கு அடுத்த மாதம் சுற்றுப்பயணம் மேற்கொள்ளும் நியூசிலாந்து கிரிக்கெட் அணியானது இரண்டு போட்டிகள் கொண்ட T20i மற்றும் மூன்று போட்டிகள் கொண்ட ஒருநாள் தொடரில் பங்கேற்கிறது.

இந்த சுற்றுப்பயணம் அடுத்த மாதம் 9ஆம் திகதி நடைபெறவுள்ள T20 தொடருடன் ஆரம்பமாகவுள்ள நிலையில், இரு தொடர்களுக்குமான 15 பேர் அடங்கிய நியூசிலாந்து கிரிக்கெட் அணி அறிவிக்கப்பட்டுள்ளது. 

நியூசிலாந்து கிரிக்கெட் அணியை மட்டுப்படுத்தப்பட்ட ஓவர்கள் கொண்ட போட்டிகளில் வழிநடாத்தி வந்த கேன் வில்லியம்சன் பதவி விலகிய பின்னர், அவ்வணி பங்கேற்கும் முதல் மட்டுப்படுத்தப்பட்ட ஓவர்கள் கொண்ட தொடர்களாக இலங்கை சுற்றுப்பயணம் அமையும் நிலையில், நியூசிலாந்து தரப்பினை வழிநடாத்த சுழல்பந்து சகலதுறை வீரரான மிச்சல் சான்ட்னர் நியமனம் செய்யப்பட்டுள்ளார். 

மறுமுனையில் அணியின் சிரேஷ்ட வீரர்களான கேன் வில்லியம்சன், டிம் செளத்தி, டெவோன் கொன்வேய், டொம் லேதம் மற்றும் ரச்சின் ரவீந்திரா ஆகிய வீரர்களுக்கு இலங்கை சுற்றுப்பயணத்தில் ஓய்வு வழங்கப்பட்டு புதிய வீரர்களுக்கு வாய்ப்பு வழங்கப்பட்டுள்ளது. 

நியூசிலாந்து அணி 

மிச்சல் சான்ட்னர் (தலைவர்), மைக்கல் பிரஸ்வல், மார்க் சாப்மன், ஜோஸ் கிளார்க்சன், ஜேகப் டப்பி, லொக்கி பெர்குஸன், ஷேக் பெளல்க்ஸ், டீன் பொக்ஸ்கிரப்ட், மிச் ஹேய், ஹென்ரி நிக்கொல்ஸ், கிளன் பிலிப்ஸ், டிம் ரொபின்சன், நேதன் ஸ்மித், இஸ் சோதி, வில் யங்